قال الرئيس عبد الفتاح السيسي: إن التصور الهندسي لمدينة العدالة التي يتم تنفيذها في العاصمة الإدارية الجديدة في الوقت الحالي، سيجعلها أكثر إنجازًا.
وأضاف الرئيس السيسي، خلال افتتاح مركز البيانات والحوسبة السحابية في العاصمة الإدارية، اليوم الأحد: “الرقم لرقمنة مدينة العدالة كام؟، عشان الناس بتقول بتصرفوا كتير ليه؟، هوا أنا عندي خيار تاني، يا نبقى زي مخاليق ربنا في كل الدنيا يا نبقى متخلفين”.
وتابع الرئيس السيسي : “إحنا دولة مش غنية ولازم نعمل الكلام ده، ولازم نعمل اللي يحقق للبلد غير الأرقام اللي إحنا بنتكلم فيها، مصر لو عندها كوادر بشرية متقدمة ومتطورة، ده أقل قدرة استخدام كوادر بشرية في العمل ده يا جماعة”.
وأشار : “المصريون اللي بيروحوا يقفوا مع ولادهم في المدارس عشان يعلموهم، لو أنتم موقفتوش مع ولادكم من ابتدائي وثانوي عشان تعلموهم الكلام ده، فرص إننا نتقدم ونبقى أغنياء هتقل”.
وقال الرئيس السيسي: “بقول لكل أسرة مصرية عندها ولاد في ابتدائي وإعدادي دلوقتي، إذا كنتم عاوزين تعملوا لولادكم حاجة خليكوا في اللي أنا بقول عليه دلوقتي، مستوى البرمجيات وصناعة التعهيد، في دول عدد سكانها بسيط جدا جدا لا يتعدي ملايين على إصابع الأيدي، ويعمل في هذا المجال أكثر من نصف مليون شخص”.
واستكمل : “عارفين يعني إيه 500 ألف .. كل واحد يعمل 100 ألف دولار يعني 70 مليار دولار، مش عايزة مصنع ولا حاجة عايزة دماغ وحاسب آلي فقط، في دول تانية عددها كبير أوي”.
ولفت: “إحنا لسه في المستوى الأول “التعهيد”، أنا في اللقاءات دي هدفي أشاور لوزارة التربية والتعليم والتعليم العالي والإعلام، إحنا بلاد معندناش موارد، 95% من مصر صحراء، مفيش عندي غير الإنسان، طيب أنت مهتم تعلمه إيه، هتقولي طب ما تعلم، إحنا عاملين جامعات وكليات بعدد ضخم جدا وبنستهدف أرقام من وجهة نظري متواضعة جدا، ليه؟.. عشان عايزين نخرج من اللي إحنا فيه، لما تقولي بنطلع دلوقتي 4 و 6 مليارات دولار، أنا عايز 100 مليار و 200 و300 مليار دولار، مصر دولة كبيرة أوي وطلباتها كتير ومش هتقدر تنتج كل طلباتها، لو اهتمينا بالـ105 مليون شخص في مصر”.